Кембрижийн гүнгийн ахайтан Кэйт Мидлтон хоёр дахь хүүхдийнхээ зулайг үнэрлэхээр өдгөө 7 сартай жирэмсэн байгаа билээ. Ирэх дөрөв дүгээр сард дараагийн хүүхдээ хүлээж авах Кэйт нийгмийн ажилдаа идэвхитэй оролцож огтхон ч ядарч, түүртсэн шинжгүй байгаа нь сайн боловч өндөр өсгийт өмссөөр байгаа нь түүнийг дахин шүүмжлүүлэхэд хүргээд байна. Хунтайж Жоржийг тээж байхдаа ч яг энэ шүүмжлэлд өртөж байсан Кэйт олны үгийг сонсохыг хүсэхгүй байгаа бололтой. Долоон сартай жирэмсэн хүн таваас дээш сантиметр өндөр өсгийт өмсөнө гэдэг бол зүй бус хэрэг хэмээн олон хүн түүний энэ үйлдэлд бухимдалтай хандаж байгаа аж.