ДБЭТ-ын найрал хөгжимчид, найрал дуучид ОХУ-ын Буриад Улсын Улаан-Үд хотыг зорьж, айлчлан тоглолтоо хийв.

Энэ сарын 5, 6-нд болсон "Байкальский VI рождественский фестиваль"-д тэд найрал дуу, симфони бүтээл, дуурийн найрал дуунуудаас бүрдсэн тоглолтоо тэндхийн  дуурь, бүжгийн академик театрт тоглож, мөн олон улсын уралдааны шагналт төгөлдөр хуурч Дмитрий Маслеевтай хамтран П.И.Чайковскийн төгөлдөр хуурын I концерт, хөгжмийн зохиолч З.Хангал, Л.Мөрдорж, И.Штраусын бүтээлээс бүрдсэн симфони концерт Улаан-Үдийн үзэгчдэд толилуулсан юм.

Энэ арга хэмжээ нь П.И.Чайковскийн мэндэлсний 175 жилийн ойд зориулсан томоохон тоглолтуудын нэг болсноороо онцлог байлаа.

Өнгөрсөн жилийн “Алтаргана” наадмын үеэр ДБЭТ-ын захирал Ч.Мөнхзул Буриад Улсын Соёлын яамны сайдтай ярилцаж эхлүүлсэн энэхүү төсөл биеллээ олж, хоёр орны соёлын гүүр болов.

                                                                                                                                     Г.Золзаяа