Нэг хүнд ногдох нутаг дэвсгэрийн хэмжээ

Монголын хүн амын 2 хүн тутамд 1км2 газар нутаг ногддог нь дэлхийн рекордод багтжээ.

100 хувь хувийн сууцтай

1997 онд монгол айл өрхүүд 100 хувь хувийн сууцтай гэж Гиннест бүртгүүлж байжээ. Монгол гэрийг хувийн сууц гэж үзэж байна.

Хамгийн урт Теризинозаврийн хумс

1961 онд Монголын говиос олдсон Теризинозавр  хэмээх эртний үлэг гүрвэлийн сарвуу хумс 91 см урт байсан нь дэлхий дээрхи хамгийн урт хумс гэж үзжээ.

Нэг жилд хамгийн их давсан сумо бөх

Их аварга ёкозүна Хакухо Даваажаргал 2009 онд нэг жилийн дотор сумогийн 90 барилдааны 86-д нь давснаар дэлхийн дээд амжилтын эзэн болжээ.

Хамгийн хол зайн морин уралдаан

2011 онд Хэнтий аймгийн Биндэр суманд болсон "Монгол Дерби" хэмээх 1000 км үргэлжлэх морин уралдаан дэлхийн хамгийн хол зайн уралдаан гэж бүртгэгджээ.

Хамгийн том хэмжээний монгол бөхийн барилдаан

2011 онд Монголын үндэсний бөхийн холбооноос зохион байгуулсан уг барилдаанд 6002 бөх оролцсноор дэлхийн хамгийн олон бөх барилдсан монгол бөхийн тэмцээн гэж бүртгэгджээ.

Хамгийн том морьтой парад

2013 онд Монголын морин спор уяачдын холбооноос зохион байгуулсан уг парадад 11 мянга 125 морьтой хүн Хүй долоо худагт цугларч дэлхийн амжилтад бүртгүүлсэн байна. Уг парадад оролцсон хүмүүсээс хамгийн залуу нь 2 нас 8 сартай, хамгийн хөгшин нь 90 настай байжээ.

Хамгийн олон морь оролцсон уралдаан

2013 онд Монголын морин спор уяачдын холбооноос зохион байгуулсан уг уралдаанд 4249 морь уралдаж дэлхийн дээд амжилт тогтоожээ. Унаачдаас хамгийн залуу нь 7 настай, хамгийн хөгжин нь 79 настай байсан байна.

Marinelli bend хэмээх нугараад шүдэн дээрээ тогтох үзүүлбэр

2013 онд Туркийн Истамбул хотод Эрдэнэбилэгийн Цацрал 4 минут 17 секундээр уг амжилтын эзэн болжээ.

Сонирхуулахад

Монголын газар нутаг дээр зарим нэг Гиннесийн амжилт бүртгэгдэж байжээ.

Шуудай углаад хамгийн хурдан зам туулсан

АНУ-ын иргэн Ашрита Фурман 2007 онд Баруун салаанд 1,6 км газрыг 16 минут 41 секунд туулснаар уг амжилтын эзэн болж байжээ.

Kite buggy-аар хамгийн хол аялсан

2004 онд Монголын говьд Пете Аш, Киерон Брэдли, Бриан Куннингам нар Kity Buggy буюу шүхрээр чирэгддэг 3 дугуйтаар 1015 км зайг туулж дээд амжилтаа бүртгүүлжээ.