Монголын оюутны спортын холбооноос 2014 оны шилдгүүдээ тодруулж, ҮБТДС-ийн багш, чөлөөт бөхийн оюутны шигшээ багийн дасгалжуулагч Ц.Баярсайханыг “Оны шилдэг дасгалжуулагч”-аар, мөн сургуулийн оюутан, оюутны дэлхийн аварга, олон улсын хэмжээний мастер Т.Түвшинтулгыг “Оны шилдгийн шилдэг оюутан тамирчин”-аар өргөмжлөв.

Өнгөрсөн долоодугаар сард Унгар улсын Печ хотод болсон чөлөөт бөхийн оюутны ДАШТ-ний 61 кг-ын жинд ОУХМ Т.Түвшинтулга түрүүлсэн бол 57 кг-ын жинд ҮБТДС-ийн оюутан, ОУХМ Б.Хаш-Эрдэнэ, 65 кг-ын жинд мөн сургуулийн оюутан, ОУХМ Б.Батмагнай нар хүрэл медаль хүртсэн юм. “Оны шилдэг оюутан тамирчин”-аар Их мастер, гавьяат тамирчин Б.Мөнгөнтуул, буудлагын спортын ОУХМ Т.Баярцэцэг, боксын спортын ОУХМ Н.Ариунболд, модон бөмбөгийн спортын ОУХМ Э.Энхтүвшин нар шалгарлаа.

                                                                                                                                  Г.Золзаяа