Монголчууд Манжийн дарлалаас салж, Богд хаант Монгол Улсыг байгуулсны 103 жилийн ой буюу Үндэсний эрх чөлөө, тусгаар тогтнолоо сэргээсний баярын өдөр ирэх долоо хоногийн даваа гаригт буюу 29-нд тохионо. Хуулиар энэ өдөр бүх нийтээр амардаг. 12 дугаар сарын 30,31-нд хэвийн  ажиллаж шинэ оны эхний өдөр амарч нэгдүгээр сарын 2-нд ажилладаг уламжлалтай. Тэгвэл Засгийн газрын өчигдрийн ээлжит бус хурлаар нэгдүгээр сарын 2-ны өдөр баасан гаригт тохиож байгаа тул уг өдрийг амралтын өдөр болгон, нэгдүгээр сарын 10 буюу ирэх долоо хоногийн бямба гаригийг ажлын өдөр болгохоор шийджээ.