Ирэх даваа гараг буюу 12 дугаар сарын 29-нд бүх нийтээр амарна. УИХ-н 2007 оны 8 сарын 16-ны хуулиар уг өдрийг нийтээр тэмдэглэх тэмдэглэлт өдөр болгосон бөгөөд 2011 оны 12 сарын 23 өдрийн хуулиар Үндэсний эрх чөлөө, тусгаар тогтнолоо сэргээсний баярын өдөр хэмээн нийтээр тэмдэглэх баярын өдөр болгон хуульчилсан юм.

1911 оны цагаагчин гахай жилийн өвлийн дунд сарын шинийн есөн буюу аргын тооллын 1911 оны 12 сарын 29-нд Монгол Улсын түүхэнд 200 гаруй жил үргэлжилсэн Манж Чин гүрний ноёрхлыг эцэс болгон Монголчууд үндэсний тусгаар тогтнолоо зарлаж байв. VIII Богдыг Монгол Улсын шашин төрийг хослон баригч, хэмжээгүй эрхт хаанд өргөмжилж таван яам бүхий Засгийн газрыг байгуулан тусгаар тогтносон Богд хаант Монгол улсыг байгуулсан түүхтэй.