ХААИС-ийн Хос зэрэг олгох хөтөлбөрийн дагуу ОХУ-ын Эрхүүгийн Хөдөө аж ахуйн академи, Новосибирскийн Хөдөө аж ахуйн их сургууль, БНСУ-ын Чонбукын үндэсний их сургуулийг тус тусын сонгосон мэргэжлээр амжилттай дүүргэсэн 20 оюутны төлөөлөлд өчигдөр диплом гардуулан өгчээ.

ОХУ-ын Эрхүүгийн хөдөө аж ахуйн академийг 12, Новосибирскийн хөдөө аж ахуйн их сургуулийг тав, БНСУ-ын Чонбукын үндэсний их сургуулийг гурван оюутан  хос хөтөлбөрөөр дүүргэсэн байна.Дээрх оюутнуудад Захиргааны албаны дарга Ц.Сүхтулга дипломыг нь гардуулан өгөхдөө эзэмшсэн мэргэжлээрээ амжилттай ажиллахыг ерөөсөн байна.

Энэ үеэр Ц.Эрдэнэбалжир “ОХУ-ын Новосибирскийн Хөдөө аж ахуйн их сургуулийг механик инженер мэргэжлээр төгссөн. Энэ сургуульд ХААИС-иас суралцахаар очсон хамгийн монгол оюутан. ОХУ-д суралцана гэдэг сургалтын бааз, орчин нөхцөл өөр тул олон талын мэдлэг чадвар эзэмших шаардлагатай тулгардаг. Энэ бүхнийг даван туулж, хичээсний үр дүнд амжилт ойрхон байгаа” хэмээн өгүүлжээ.

Харин Э.Зориг “ОХУ-ын Эрхүүгийн ХААИС-ийг инженер механик мэргэжлээр суралцсан. Одоогоор “Автобус нэгтгэл” II баазад цахилгааны инженерээр ажиллаж байгаа. Хямд зардлаар ОХУ-д суралцана гэдэг хамгийн том боломж байсан” хэмээжээ.

                                                                                                            Г.Золзаяа