Үндэсний Супер Лигийн эмэгтэйчүүдийн сагсан бөмбөгийн гурав дахь тоглолт боллоо. Ц.Цэвэрбал дасгалжуулагчтай ХҮДС "Ирвэсүүд" баг лигийн эхний тоглолтоо хийв. Өнгөрсөн жил "Ирвэс"-үүдийн "Спрайт Супер Лиг"-т тоглож байсан бүрэлдэхүүн нь шинэчлэгдэж, залуу тоглогчдоор баг бүрдүүлсэн байлаа.

Харин тэдний эсрэг өрсөлдөгч нь лигт эхний хожлоо аваад байсан "Баянгол Фалконс" баг байлаа. Ц.Цэвэрбал дасгалжуулагчтай "Ирвэс"-ийн залуу бүрэлдэхүүн тоглолтыг оноогоор тэргүүлж эхэлсэн.

Туршлагатай, шилдэг төвийн тоглогч Б.Болор-Эрдэнэ дээр тулгуурласан тоглолт явагдахад тэрбээр 25 оноо, 15 самбар авч багаа тэргүүлсэн юм. Мөн Г.Оюун-Эрдэнэ 9 оноо, Б.Нандинцэцэг 6 оноо, 10 самбар, Ш.Өнөрмаа 5 оноо, 11 самбар авсан. Тоглолтоо тун дажгүй эхлүүлсэн тэд тоглолтын төгсгөлд алдаа гаргав.

Тэдний дамжуулалтыг ОУХМ Д.Ганзул хоёр ч удаа таслан, хурдан довтолгоонд шилжсэнээр тоглолт өөрөөр эргэсэн. "Фалконс" багаас Д.Ганзул 15 оноо, Ж.Мөнхсувд 15 оноо, 11 самбар, Б.Солонго 8 оноо, 9 самбар, Цолмон 8 оноо авч багаа тэргүүллээ.

Тоглолтын төгсгөлийг туршлагтай "Фалконс" баг сайн хийж, 54:53 харьцаатай хожин улирлын хоёр дахь хожлоо авав.

                                                                                                             Г.Золзаяа