Тагнуулын Ерөнхий Газрын даргаар Б.Хурц томилогдлоо. Тэрээр 1969 онд Улаанбаатар хотод төрсөн. Нийслэлийн 23 дугаар дунд сургууль, мөн Эрхүү хотын барилгын техникумыг төгссөн. 1997-1999 онд Москва хотын Эдийн засаг статистик мэдээллийн их сургууль, 1999-2000 онд ОХУ-ын Аюулгүй байдлын академид суралцаж төгссөн эдийн засагч, хууль мэргэжилтэй. Өмнө нь Үндэсний аюулгүй байдлын зөвлөлийн ажлын албаны дарга, АТГ-ын дэд даргын алба хашиж байсан.  

Татварын Ерөнхий Газрын даргаар Б.Ариунсан томилогдлоо. Тэрээр Говь-Алтай аймгийн уугуул. Инженер эдийн засагч мэргэжилтэй. Б.Ариунсан нь Улсын хангамжийн газрын дарга, Татварын ерөнхий газрын дэд дарга, ЭБЭХ-ний дэд сайд, Тагнуулын Ерөнхий газрын дарга зэрэг албан тушаалыг хашиж байжээ. 2012 онд АН-аас УИХ-ын сонгуульд Говь-Алтай аймагт нэр дэвшин өрсөлдөж УИХ-ын гишүүн Ц.Дашдоржид ялагдсан.

Цагдаагийн Ерөнхий Газрын даргаар Р.Чингис томилогдов. Хуульч, эрх зүйч мэргэжилтэй. 1985-1989 онд ЗХУ-ын ДЯЯ-ны академид эрх зүйч, 2001-2004 онд АНУ-ын Колорадогийн их сургуульд Хууль зүйн магистр, 2011 онд ХСИС-д докторантурт суралцсан. АНУ, Канад, Австрали, Японд мэргэжил дээшлүүлсэн. 2004-2007 онд Эрүүгийн цагдаагийн газарт тасгийн дарга, 2007-2012 онд Эрүүгийн цагдаагийн газрын хэлтсийн дарга, 2012 онд Цагдаагийн ерөнхий газрын Тэргүүн дэд дарга, 2012 оны 9 дүгээр сараас Хууль сахиулахын их сургуулийн захирлаар ажиллаж байв.

Шүүхийн Шийдвэр Гүйцэтгэх Ерөнхий Газрын даргаар Б.Билэгт томилогдлоо. Тэрээр 1960 онд Хэнтий аймгийн Бэрх тосгонд төрсөн. 1978 онд Нийслэлийн 10 жилийн 5 дугаар сургууль, 1980 онд ЗХУ-ын Эрхүү хотын УААДС-ийн Санхүү, эдийн засгийн сургууль, 1988 онд МУИС, 1999 онд Отгонтэнгэр их сургууль төгссөн. Нягтлан бодогч-эдийн засагч, эрх зүйч мэргэжилтэй. ХААҮЯ-ны Гадаад харилцаа, эрх зүйн газрын дарга, Монголын радио, телевизийн Хэрэг эрхлэх газрын дарга, Тагнуулын ерөнхий газрын дарга, Үндэсний аюулгүй байдлын зөвлөлийн Ажлын албаны дарга, Цагдаагийн Ерөнхий Газрын даргаар ажиллаж байжээ.